今年動漫節有得試玩遊戲裡面最受玩家歡迎既一定有《Dragon Ball Fighter Z》份，話晒隔咗咁耐終於出返隻 2D 格鬥仲要同格鬥名廠 Arc System Work 合作啵。係今次既 ACG HK 2017 遊戲製作人平野真之就黎咗香港並且接受咗媒體既訪問，為大家帶黎更多既《Dragon Ball Fighter Z》情報。
係訪問之前《Dragon Ball Fighter Z》既舞台活動就為大家帶黎2個好消息，一個就係遊戲會有埋繁體中文版。另一個消息就係將會於 9月 16 -18 日進行為期 3 日既封測，咁講到明封測就梗係要抽中先有得玩啦，暫定 8 月 22 日就會有得申請，形式同 Gundam Versus 一樣都係 DL 張卷就搞掂。
去到訪問環節，一如所料平野真之對於保密呢方面做得好足，所以一啲大家最想知道既野例如：有咩新角色、有咩場地、故事模式會係咩部份等等都係無可奉告既，當然亦都有部份問題算係滿足到 Fans 既。
係記者會上面提到，《Dragon Ball Fighter Z》既繁體中文版只有一個版本，即係唔似 Gundam Versus 咁有得揀香港繁體定係台灣繁體，根據呢個排面就 9成9都係用台版名架啦，一諗到會有得用克林、比克、弗利札、魔人普烏、賽魯呢啲角色真係扯扯地阿！
另外有試過或者有睇過我地之前份包膠既朋友都應該知道今次遊戲操作既設定係屬於非常簡單，咁平野先生就話因為需要考慮新手玩家所以設定係相對簡單，不過都有部份進階既操作技巧既。咁我地就當然趁住呢個機會順便問下平野先生「有鑑於唔少玩家甚至 EVO 既一班Pro Gamer 試玩後都一致認為遊戲設定過於簡單，會唔會係稍後作出調整去拉遠 Pro Gamer 同普通玩家既水平呢」，之不過唔知係咪翻譯姐姐誤解咗條問題係「有資深玩家覺得遊戲試玩版比較易，係咪想令更多玩家都享受到遊戲所以設計為呢種遊戲難度」，所以平野先生都只再重複一次話因為需要考慮新手玩家就算。
遊戲模式方面係會有故事模式，不過同上面所講一樣乜都唔透露得，到底係舊故事定係好似《Dragon Ball Xenoverse》咁會有自己故事就唔講得啦，角色就只係話以格 Game 黎講就屬於「足夠」既數量。(然後望下 Arc System Works 之前隻 Guilty Gear Xrd -SIGN-……)
Guilty Gear Xrd -SIGN-
咁講開角色大家關心既其中一點就係無閒阿、阿樂、撒旦先生呢啲會唔會係角色強度上面同悟空果堆差太遠呢，平野先生就話係會有咁既可能，不過佢地作為 Assist 果陣既輔助效果亦都會相應上調去達到平衡咁話。
可能出黎掉仙豆補血呢
同時龍珠既特色「合體」同埋「巨大化」都有媒體朋友問到，不過都係果樣啦……唔講得，你地自己估住先啦！
《Dragon Ball Fighter Z》將於 2018年初發售，對應機種 PS4 / XBox One / PC。
回帶相關文章：
VJGamer總編，細細個已經蒲機舖，機齡甚深，熱愛電玩文化。