《大獸神》都砌完好一陣子，市面上都缺貨一排，要買嘅朋友都應該一早入手玩到開始貼紙都甩甩地啦，終於等到隻《龍皇凱薩》喺動漫節搶先到貨(雖然貴左少少=.=)。

一盒過，大大盒

見到咁，你都應該拎定隻《大獸神》出嚟啦！

《龍皇凱薩》嘅件數真係唔算多，上色件都只係兩個頭，純素組一個鐘左右真係乜都起得晒。
出嚟啦，龍皇凱薩！

龍型態下係幾高質，不過水口位置始終都係一直未解決嘅問題。

拍埋大獸神身邊就準備合體啦！

將對手拆出嚟再收好手臂

細細都覺得呢個合體算係幾hea

獸帝大獸神，登場！

合做《獸帝大獸神》之後活動性的確低左啲，不過都總比復刻版嘅高好多。

之後就更加要睇埋四機合體嘅《剛龍神》啦！

其中一個扣分位係今次《剛龍神》要換件先變到出嚟，啫係點都要搵地方收好多出嚟嘅配件。

總結

外型真係令唔少 Fans 落搭，加上你儲左隻《大獸神》你都冇得唔入啦！唯一高興嘅係《獸帝大獸神》狀態下都可以擺到下 Pose，分色上都冇乜挑剔，但大量嘅貼紙、某些部件嘅接合不穩都係令人大大扣分嘅地方。

以CP值去計《SUPER MINIPLA 龍皇凱薩》唔算係超值得入手，尤其你只愛《龍皇凱薩》一隻就真係無謂落水啦！(身邊唔少人真係淨想入呢隻)

但如果你係之前冇早訂，而準備現貨入就真係等到官方訂價 3,780円 (約港幣 $267 左右)，無謂高追或者搶住入手。