上回講到L陣法，雖然大家可能已經有L既概念，但係其實係未講完。上次講叫大家唔好俾人L，查實點先可以做到呢？

5 眼看八方（轉Lock睇雷達）

要防止對方L自己，就需要經常留意右下角既雷達或者撳下轉lock制。

雷達就唔太多講啦，原因除左雷達資料一目瞭然之外，最重要大家玩緊果陣要捉對方硬直又要避槍，仲要要求個新手睇雷達似乎係有D太過啦，如果你覺得自己handle到就當然最好。即使係唔得，有轉lock既習慣問題都可以解決。

我記得我仲係細路哥果陣去過交通安全城，個miss教我地過馬路果陣記得左望望右望望要留意附近環境狀況確保安全。而打高達都一樣確保安全，就係靠個轉lock制轉視點。 你可以會問咁轉lock同防止人地L有乜關係，關係就大啦，因為轉lock 已經可以判斷出對方有冇準備L緊你。

呢2幅圖見到敵人都在主畫面內，所以轉lock 背景變化不大，而且可以一次過睇曬到對方血量

要透過轉lock去判斷自己有冇俾人L緊，就留意轉lock既畫面有冇好大幅度既轉變。 如果對方兩部機都係見到你既畫面內，你撳個轉lock制就好似用隻眼左右瞄一瞄咁，一般情況都唔會有野係左右射你（講左係一般，即係有非一般既存在，日後再講），咁就俾人進攻都可以睇住黎應對。但如果你撳個轉lock制就好似要用個頭左擰右擰咁，就算唔講俾人L位易D中冷槍既問題，長期咁Fing發頭都暈啦，仲點打機呀。 預防勝於治療，唔入L 位就安全（好廢…）

呢二張就見到點為之俾人L位射到屎忽開花。轉一轉另一個目標「直頭係屋頂咁滯」。 同頭先果2張相比，因為兩部分別處於唔同位置形成L陣法，背景自然大大不同，依個情況不停轉lock 畫面變化之大，要捕追對方動作也十分困難，亦係俾L位時容易中招既原因之一

6 走位

上面只係觀察對方有冇L緊自己，要真正防止對方L都係要走位。其實走位好考經驗，我都唔知點同大家講，不過可以分享幾個常見既情況俾大家聽

A. 自己俾人L緊，而我方又L緊對方其中一個

依個情況自己就應該減少攻擊盡力回避，同時望實自己隊友既目標（俗稱集Lock)。由於自己係被L既一方，通常回避都最首要既任務，拉L位既責任係隊友身上。只要等到隊友打一槍，自己可以把握到機會補多2槍打down 對方，自己破左對面既攻勢，亦有時間可以逃離現場。

B.自己俾人L緊，而自己友遠到唔知去左邊

依個情況多數係中途1on1導致。 對自己有信心既，可以繼續扮同自己對手1on1，實質就等機會突然轉lock反陰另一個後來偷襲既對手，因為有好多時前來偷襲既都以為自己冇人lock，會俾平時心急同大意疏於防範，就會出現偷雞蝕渣米既情況。情況容許下就飛番去自己隊友身邊重鼓陣營，當然要視乎自己係用乜野cost 既機體同血量去作判斷。

7 機體Cost及組合簡介

由Gundam VS Gundam 開始加入Cost Over既元素，Cost Over是指機體被對方撃破時，會按剩餘戰力去調整新機落地既血量，打開Seed-D或之前就要適應一下，千祈唔好自己死先仲大安旨意等埋Partner死埋先，你Partner真係粗都爆埋出黎。 以下會為唔同既cost組合作出講解及分析。

500+500

VS系列由第一集開始為免大家淨係用曬性能最好既大機，刻意設計到總戰力唔可以支撐到兩部大機既維修費，所以兩部大機既組合大多數只會用一前一後或長期1on1依兩種戰術應戰。

一前一後既戰術，盡量令對方砲火集中行得較前既目標，好等較前果個可以專心回避同反擊，較後果個就可以專心拉L補位同見隊友差唔多被擊落時安排撤退，以免被對方同時擊落即時玩完既風險。 而長期1on1 就相對一前一後既戰術風險較高，但由於500性能上係理論上已經係全隻Game最抽得果D機同時又飛得最快，同非500+500既組合對敵「理論上」最少有一部機性能上佔優，尤其是隊中有艾比安既時候。分開隻揪隻，艾比安超卓既格鬥性能就可以盡情斬到對面甩皮甩骨，唔洗驚對方隊友阻頭阻勢。

要留意既係500+500除左無得一人死一隻外，由於儲氣係主要靠俾人打中扣同被擊落而累積，基本上負責做後衞既500機係極少機會儲滿全條覺醒Bar(簡稱全覺），係出唔到受身覺醒，所以當覺得自己有危機既時間早少少爆避定先，唔係中左招就太遲啦。 仲記得撳救命制叫隊友救命呀～

500+500 組合最不妙既情況…

待續⋯⋯

P.S. 總編成日強烈要講控Boost技巧好似step cancel, Boost Dash cancel, 新系統Boost Dive 點應用。依D真係自己摸索，千變萬化冇話一定要用邊招避邊招，不過下篇應該都會去講下Boost Dive，事關亂用係衰過唔用有必要講下。都係果句，抽時間睇replay啦。如果打打下覺得對手/隊友係俾自己勁，咪勁時間睇下佢做過D乜。大部份情況人地做到你都應該做到，問題係你有冇心去鑚硏既遮。

回帶相關文章：

《Gundam Versus》新手上路必備攻略第一回