《六神合體》就算邊個年代動漫迷都應該聽過佢個名，有冇睇過都好，佢嘅玩具由合金到模型都長出長賣。
話說前兩日上去 LEGO Ideas 睇睇下發現有隻幾高質嘅《六神合體》擺左上去集 Support，見佢外型還原度奇高之外，仲可以合體、分體、變型！諗住搵下邊度嘅高手，一睇發現原來係香港本地 LEGO MOC高手 Kaka Wah 嘅手筆，而且仲要係「Japan Brickfest 2017」嘅參展作品。

講返隻《六神合體》，Kaka Wah 話佢用 15 年《 ES合金 六神合體》嘅宣傳試模圖做參考，去跟返原作入面合體之後仲可以打開胸口同會體後見到 Gaia 機個頭喺內部呢兩個設定。

合體過程仲可以成隻 Gaia 放落 Sphinx 度，Kaka Wah 話可惜敵唔過 Q 版變形嘅死症，要令到個頭同手掌額外安裝，不過做到不拆件完全變形經已係一大挑戰。

問到好多第三方版權作品，LEGO Ideas 都未必會肯過審。作為一個 MOC 製作者嘅 Kaka Wah 話其實官方出唔出唔係重點，創作嘅過程已經係一種享受，擺上 LEGO Ideas 只係想話俾其他人知，香港都有好多 MOC 製作者默默奮鬥緊，而佢只係其中一個。不過有樣野佢表示好清晰係「就算 LEGO 唔出，我都唔會賣俾其他品牌，絕對支持正版。」

LEGO Ideas 《六神合體》GODMARS 支持傳送門