【遊戲評測】超高質大作《Injustice 2》- 進入格鬥新世界 (下篇)

承上篇，今次就到咗最重要既格鬥遊戲核心啦，就係遊戲系統。不過雖然話呢篇係 Review，但係因為呢隻係香港人比較少接觸既美式格鬥，所以會集中講解系統以及《IJ》同大家慣常玩開既日系格鬥既分別。

一隻格鬥 Game 好唔好玩，好大部份係取決於佢既戰鬥系統，例如街霸 3既 Blocking、4代既 Saving Attack，甚至創出儲氣先河既龍虎之拳等等，都賦予咗每隻格鬥 Game 既獨特性，而去到《IJ》佢亦有唔少出色既系統，而家一一為大家講解。

街霸 3既 Blocking

街霸 4既 Saving / Focus Attack

Btw 老實講開頭玩《Injustice 2》我係鬧既，因為感覺上同玩開既日系格鬥實在有好大既分別，簡直係唔慣到嘔。

首先係動作表現方面，佢唔似日系格鬥咁中招或者擋格有明顯既畫面特效表示。係《Injustice 2》入面就用咗種比較接近現實既表示方式，大部份拳腳打中人其實都無乜好顯眼既特效，如果擋咗既話……Sorry 粒爆花直頭睇唔到咁滯。之不過隻 Game 利用聲效去補足返，所以打擊感有之餘其實都幾好 Feel 的，但係當隻遊戲咁樣表達既時候變相就令到你要好熟悉角色既招式先會玩得爽 (例如幾時可以用咩招確反咁)。

街霸 5 有華麗既中招特效

Injustice 2 既特效最盡係咁

擋咗既話……唔細心睇真係唔覺眼有特效

(確反：利用對方攻擊之後無法行動的硬直來進行反擊)

另一樣大分別就係指令入力。除咗有一啲唔係慣常見到既指令 (例如：↓←+Δ←)，佢仲係一隻極度講求回中既遊戲。

比個例子，以街霸既龍為例，下重拳波既出法可以係 ↓+HP > ↘→+P。但係黎到《Injustice 2》既出法就會變為 ↓+HP > 回中 > ↓→ / ↓↘→+P。

奇怪指令，但係 in game 既招表已經比你睇埋 Frame Data，好貼心

就咁睇可以覺得問題不大？咁少年你真係太年輕鳥…..《Injustice 2》入面，大部分角色都會有指令係 ←→+Δ，而呢個指令多數都係快速起手既突進技。即係話你假如你擋完想確反既時候係唔能夠拉實後黎出，而係要 ← > 回中 > ←→+Δ，對由細玩街霸大既朋友 (包括我) 相信係會極度唔慣。

大部份角色都有突進技

到隻 Game 既連招系統，都同我地玩開既日系格鬥好唔同，因為所有角色既連招都係 TC 起手又或者中間會夾住 TC，更高階係會連幾套 TC 的。雖然係咁，但係連招成立既條件就出奇地簡單，就係：角色浮空就可以連。由於連招條件寬鬆，同時全部角色都最少有 3招普通技可以打到對手浮空，所以 Combo 組合既自由度亦都非常之大，基本上《Injustice 2》既連招系統係任你發揮創意咁滯，就算對 Chok 招有困難既朋友，淨係 TC 連 TC 都有唔錯既威力，例如下面既示範咁。( 當然目押連招亦都係存在既)

呢招就係 Batman TC x3 Combo

上面講到大部份起手連招都係要靠 TC，之但係 TC 入力係要求好快撳完，就咁講大家可能唔明個「快」係點，呢度我以街霸 4 既 Guy 做例子。

Guy 既武神獄鎖拳：LP > MP > HP > HK，每下間隔大約有 5 – 12f 左右時間 (純自己感覺)

《IJ 2》既 Batman TC：1 > 2 > 3，每下間隔只約有 1 – 3f 左右時間輸入 (純自己感覺)，留意左邊指令輸入速度

當去到要做 Hit Confirm 連招既時候差異就更明顯

Guy 既武神獄鎖拳：LP > MP > HP > HK > ↓↙← + PP，HK 去 ↓↙← + PP 有差唔多半秒時間確認

《IJ 2》既 Batman TC：1 > 1 > 2 > ↓→+1，Sorry 你係 2 > ↓→+1 呢part 都係得 1-3f 時間輸入，你需要直接係 TC 途中做確認

亦即係話要做到 Hit Confirm 其實都要幾快反應，不過呢樣玩玩下就會慣架啦。

係《Injustice 2》最重要既系統其實就係條超必 Bar，佢可以做到既野非常之多，其中一樣就叫 Meter Burn，簡單啲講就類似街霸既 EX技，消費一格超必黎出強化版必殺技，但係如果淨係當佢係街霸 EX 技又真係太過睇少佢啦！

大部份角色既 Meter Burn 會完全改變招式既屬性，例如羅賓既飛鏢本身係來回 2段攻擊，但係 Meter Burn 之後會變為快速炸地而且有3段攻擊判定

普通版既蝙蝠鏢，先飛上再向前飛，會有2段攻擊判定，速度中等

Meter Burn版既蝙蝠鏢，先飛上然後高速炸地，攻擊判定發生速度快

Super Girl 其中一招既 Meter Burn 分別 (其實每隻角色差唔多全部技都有得 Meter Burn)

Super Girl 既噴凍氣本身係中距離飛行道具

Meter Burn 之後舊凍氣會飛全畫面，仲會令對方結冰，然後可以連 Combo！

連招除咗用 Meter Burn之外，其實連轟飛技都可以使用 (TC中 ←←+5) ，只要消耗 2格氣就可以普通技 > 轟飛技，簡單講就係可以 TC > 轟飛技 > TC > 必殺技咁樣，基本上部份角色用呢招可以輕鬆打出 500以上傷害！

轟飛技除咗可以用氣令到連招成立之外，用黎起手亦都一樣可以，只要撳實 ←+ 35 / →+35，就會賦予轟飛技 Armor 屬性，可以抵擋一次攻擊 (順帶一提全角色既 →+3 都係中段屬性) ！

上面就講咗用氣既攻擊手段，但係行氣除咗可以要黎攻擊之外，仲可以要黎逃跑 / 瞬間埋身！消耗一格氣可以高速向前 / 向後碌，距離接近一個畫面，而且碌既中途只有投技先可以中斷，當對住 DeadShot 呢類角色就要善用爆氣碌！

另外上面都講到只要令人浮空就可以連 Combo，係呢個時候被打一方亦都可以消耗一格氣黎空中受身，係《IJ》既世界你識得係咩時基用氣基本上已經贏一半。

當角色血量講到去紅色 (即係第2 Round)，你會見到左上角會寫住 Clash Ready，當比人連招中果陣推實前 + R2 就可以同對方鬥力，氣多者勝。攻方贏就會打走對方一部份血量，守方贏呢就會回血，其實每次鬥力都係玩緊估心理 Mini Game :)。呢個系統係比雙方都有一次免比人連 1Set 既機會。

另外每個角色都有自己既英雄技，透過開箱或者做 Mission 仲會開到追加技能 (例如上面講過既 Wonder Women 滑行劈)。部份角色基本上靠英雄技食糊 ( Bane、Captain Cold 等)，善用英雄技絕對會將角色昇華到另一層次！

呢度用 Bane 黎做例子，Bane 既英雄技就係啪咗 Monster 之後所有必殺技都會有 1下 Armor 屬性，可以頂到一下攻擊。

由於 Bane 既 TC 收手動作都異常大，非常容易比對方確反，所以正常都會係 TC 後連 ←→+1 / ←→+2。

但係 ←→+1 / ←→+2 呢2招既發動時間都頗耐下，好容易係出手之前就會比人 Counter到。

←→+1 發動時間都頗慢

所以係呢個時候我就會由原本既指令 (TC) 123 / 113 > ←→+1 / ←→+2 變為 (TC) 123 / 113 > 4 > ←→+1 / ←→+2，如果對方慣性地係你 TC 後直接 Counter 就會中你既 ←→+1 / ←→+2。

同樣道理唔同既角色對自己既英雄技都會有大量唔同既應用方法，基本上係自由到裂，玩出自己風格真係話都無咁易！

場地設計亦都有心思，每個場地都有唔同既場景道具可以使用，例如係 Aquaman 場地最左手面就可以打爆個缸射啲水出黎攻擊敵人。但係最有心思既地方係在於會因應你所使用既角色原設定能力黎決定場景道具既使用方法。例如係酒吧呢關，超人呢類本身就有怪力既角色可以成個吊扇拆落黎掉人，但如果換做 Joker 就會變成一個跳台借力跳走。