圖片來源：Don Tam

最近見到有Switch使者四圍遊走傳教，真係有感而發想講一句，「信Switch者，得救！」

主話，神愛世人，「叫一切信他的不至滅亡，反得永生」，無錯嘅，Switch使徒就係會同你講，PS4 Pro唔一定滅亡，買兩部機玩得永生。

主話，Switch嘅降臨，唔係要定你班hardcore玩家出波get都要計frame數慢咗幾千份之一秒嘅罪，而係「叫世人因他得救」；大佬，呢點無錯架，平日返工已經夠辛苦，仲要出多部叫你睇住攻略對住打嘅遊戲機？老任其實係派大天使嚟拯救大家睇攻略嘅靈魂，只係可惜老任一時不慎，有隻叫薩爾達嘅天使入咗魔道，最後又係要人睇返攻略。

主又話，「你和你一家都必得救」。Switch Party game的確令你一家都得救，老公唔會出去滾，個個變晒只打孖車好男人，手痕至多上網陪日本妹揸下車，可以講嘅說話，得嗰幾句「i’m excited」咁大吧。

主又話（或者先知啦），「弟兄們，你們要謹慎，免得你們中間，或有人存著不信的惡心把永生上帝離棄了。總要趁著還有今日，天天彼此相勸，免得你們中間有人被罪迷惑，心裏就剛硬了。我們若將起初確實的信心，堅持到底，就在基督裏有份了。」

所以，機友身邊總有幾位好醒嘅Switch使徒，如EVA之姿般降臨世間，不斷勸你買機買game，「至多到時借卡畀你」、「幾舊水抵玩啦」、「一隻game玩到十年」、「你睇MH都出了，玩多幾次唔過份吧？」雖然，十年前佢本人熱sell嘅Wii balance board，一早已經入咗紅海，到咗舊機「應許之地」。

主又話，「我的羊聽我的聲音」，宅男也跟著我。Switch之名與你同在，你會遇然發現，Switch使徒就係引領你逃離地獄嘅摩西，眼前呢位「摩西」朋友，將兩支手製合成「pro.手杖」，一舉手，PS4就不見了。