如果你鐘意玩音樂 Game，呢隻《VOEZ》，你唔駛考慮喇，即刻課金喇！

佢係第一隻登錄 Switch 嘅音樂節奏遊戲，但呢個唔係重點；重點係：佢係 Rayark（雷亞）出品架！玩開音 Game 嘅朋友無理由無聽過《Deemo》；玩過《Deemo》就無可能唔比佢多元化嘅超高汁原創音樂所吸引！

呢隻 Game 其實喺 2016 年已經率先推出 iOS ＋ Android 版，但係用 Switch 玩有兩個大好處，首先就係一次過有哂啲歌、唔駛買歌 Pack（超過三百首樂曲譜面）其次就係唔需要連住上網先 Load 到歌黎玩！呢個絕對係毒撚福音（No offense，我都係毒撚），大佬呀你知出街無 Wifi 玩音 Game 幾食數據同電架啦……

為咗導大家落坑，以下分享兩首遊戲歌曲比大家試聽吓。

簡潔的遊戲界面

《VOEZ》每首歌都設 Easy / Hard / Special 三個難度，於 Menu 揀歌時，可以按歌曲難度、或者單純以名字分類排列。

選曲之後可以進行 Timing 調整，以及將譜面出現嘅速度調較到你想要嘅快慢，就係咁多！

有玩過 DJMAX 系列嘅朋友可能會記得佢嗰堆變態 Items 例如「加速程況下 Perfect 會加分」或者「譜面中途消失」等等；《VOEZ》就無呢啲虐待 Play 啦，分數高低全靠你技術！

遊戲嘅判定唔算嚴苛，跟住音樂節奏玩嘅每粒音基本上都會 Perfect 到……

當然譜面太密太快撳唔切，就唔關判定事啦，乖乖地練多幾次啦 ヾ(*´∀ ˋ*)ﾉ

判定為 Perfect 時會出現金黃色正方光影

對於音 Game 老手黎講，你一定會好想 Skip 哂 Easy 嘅部份唔玩，不過我就建議你都唔差在嗰一兩分鐘啦，玩埋佢，當聽熟首歌！因為 Hard 都無乜嘢，但 Special 嘅譜面都 OK 密集架！

密集都算，《VOEZ》仲有一個好特別嘅設定係：佢嘅譜面會隨住音樂拍子或者旋律而出現變化，例如係譜面幾粒音會左右調轉之類；而背景顏色條嘅顏色同律動都會跟住首歌變。剛剛開 Game 時難免會唔慣，但你又唔會嬲得佢落，因為無論譜面點變化都好，佢都盡量保持住左右對稱嘅和諧美感，其實都幾視覺享受！

就咁睇唔覺難，係咪？我話你知，首歌超快……

按鍵主要為單音、長按、左右推撥。

除咗音樂方面，遊戲其實都有故事主線，講一班高中生追尋音樂夢想咁樣；咁 Rayark 係台灣公司，所以故事背景亦都設定為台灣宜蘭。要推進故事劇，就要解鎖「日記」；而每一頁日記都會話你知要做到咩 Achivement 先可以解鎖咁樣。

解鎖日記同時會得到抽獎券，可以解鎖頭像；不過對於單機 Play 嘅遊戲黎講，頭像可能只係為咗滿足大家嘅收集慾吧（笑）

佢會痾頭像出黎…我意思，係痾蛋

單機 Game 頭像都要分 SR 同 SSR 好惡毒

再補充多少少遊戲資料！

• 無實體版架！日本 Nintendo Store 售價為 2500日元（連稅）；美版為 25 美元
• 只能觸控 Play，手制無效
• 不支援 TV 模式
• 支援繁體中文 、英文、日文任君選擇