呢排無咩大作出，趁得閒同大家介紹返 Square Enix 舊年推出嘅 RPG《我係雪豬那！》（いけにえと雪のセツナ ）。遊戲推出時嘅平台只有 PS4 同 PSV，SE 今年將佢擺埋落 Switch 我都覺得幾驚喜！實際上，研發遊戲嘅 Tokyo RPG Factory 係一間細廠，可能資源或者經驗唔夠，所以剛推出時遊戲系統上面的確有好多可以進步嘅空間；不過 Switch 版喺畫面同流暢度方面都有提昇，如果打薩爾達打到悶悶地想轉吓口味，不妨睇吓呢篇介紹文吖！（文中截圖黎自 PSV 版）

遊戲個名其實幾有心思嘅。セツナ（Setsuna）既係女主角個名，同時亦係遊戲入面一個重要攻擊加乘系統；至於いけにえ，中文官譯係祭物，日文漢字其實係生け贄……即係將活人拎去種生機求神保平安咁解。所以，簡單黎講，呢個故事嘅劇本就係一路護送女主角去死！

玩家嘅身份係僱傭兵，原本受命去刺殺 Setsuna，但係 Setsuna 表示「其實我係唔係都要死架啦，不如你做吓好心，送埋我去目的地先睇住我死啦！」

原來呢個地方有個傳統，每一代都要送個人去「世界盡頭」送死，聽講話可以令人間唔會比魔物襲擊咁話喎。喺護送 Setsuna 嘅途中，兩人當然係順理成章好似天下間所有 RPG 咁，遇上越黎越多同伴，而同伴間嘅關係同牽絆，亦令男主角冰冷嘅心始動搖：到底老細為咗咩原因要殺 Setsuna？又到底點解 Setsuna 要成為祭品？

真相就留比你地自己去玩去感受啦！雖然女主角 Setsuna 嘅設定實在超級大愛包容，成日想用愛穿透坦克車，不過睇故唔好駁故，係咪？同埋我又咁諗：角色性格鮮明係好事黎嘅！LOL

鐵漢柔情男主角

To kill or not to kill 莎翁情境 Play（不過其實根本無得揀orz）

遊戲除咗故事，連世間觀同人設都相當日系 RPG 定番。平心而論，一間細廠出到咁嘅晝面質素，我覺得算係咁，同埋玩 JRPG 重心應該喺劇本，我覺得《剎那》呢一點做得唔錯架，比大家睇吓場景截圖先。

懷舊設定：可以隨便入人地屋企開寶箱 (*ﾟ∀ﾟ*)

遊戲本身好簡潔，無收集、無釣魚、無角色好感度要經營，專心一味衝主線就得。

廣域地圖望落去就大，但係實際上可以進入嘅地方係受劇情限制的，例如係：除咗個名唔同之外基本上一樣 Setting 嘅村落、迷宮、以及部分二周目先有用途嘅地點；換句話講，唔係唔比你自由探索，而係無地方比你探索 (´・ω・`)

有灰色道路喺附近代表可進入場景

迷宮有階段差，可當回程捷徑

咁有讚亦有彈，首先講咗 Save 嘅問題先。廣域地圖可以 Save，但係城鎮入面唔可以 Save 係咩玩法？另外，迷宮入面要 Save 就要有儲存點，但係佢唔係個個迷宮有儲存點！！你可能問，打 Boss 前有得 Save 喇卦？Sor9 我都係咁以為，但係佢啲儲存點喺遊戲初至中期都幾可遇不可求，但係去到後期又變返多……呢種設計似乎就唔夠細心喇！因為你唔知下一步係劇情定打大佬，所以每次出返廣域地圖就一・定・要・Save ！

可遇不可求嘅初音色儲存點

有關回復方面，一、儲存點唔會幫你全回復；二、城入面無旅館，所以亦無得瞓覺回復，惟一會令你全回復嘅情況係升 Lv，但係，除非你專心去打升級用嗰幾隻怪啦，否則遊戲加 Exp 加得極慢！

初盤隻升級怪慷慨地加 1000 Exp

咁你可能會話，用道具回血囉，有咩問題？問題咪係無錢囉。《剎那》世界觀入面個交易系統幾麻煩…同埋得意嘅，簡單黎講嘅流程係：

（1）打怪唔會跌錢，但跌素材

（2）將素材賣比城鎮入面嘅魔導商會，得到資金

（3）資金可以入手武器、道具、法器

將素材交比魔導商會仲有一個用途，就係換法石，亦即係戰鬥中可以使用嘅招式同技能，而每種法石需要嘅素材種類同數量都唔同。講到呢度，你可能會諗「哦咁我去刷迷宮咪得囉」，但係正如我一開始所講，地圖隨劇情推進而開放，無得自由探索；而後期沿路打嘅怪得返黎嘅素材，係一定夠你換法石的。

所以勁嘅法石你一定會拎到，只係時間嘅問題，不過既然自由度咁低，呢個交易平台我就覺得有啲無謂 (´・ω・`)

每個角色可以配備嘅法石都唔同

遊戲採用 Classic 嘅 ATB 戰鬥系統，即係邊個條氣儲滿就行動，敏捷度比拼 Play！假設兩個角色同時儲滿氣，可以出特定連攜技；而喺戰鬥入面使用連攜技或其他技能都會消費 MP。

儲氣嘅同時會累績「剎那」值（圖中雪花標示），無論係物理抑或魔法攻擊，喺出招畫面閃現藍光嘅一剎那，按下正方制，就可以昇華攻擊；昇華攻擊有唔同類型，例如係補多一刀、加 Critical、幫自己回氣……昇華嘅程度視乎兩樣嘢：招式熟練度以及法器能力值入面有無其他加乘嘅效果。

出現藍光時按口就用到剎那

角色連攜技

法器嘅功能各有不同

【總結】

遊戲劇本 OK 嘅，係就係老套架喇，但角色描寫鮮明，喺故事方面都易投入嘅。對於動作遊戲苦手嘅朋友可能會鍾意，不過戰鬥流暢度低，呢一點就真係玩到我少少躁！因為就算係路邊怪都唔一定係雜魚，Boss 一招 KO 你更加不在話下，所以點都要練 Lv；而難處咪就係，個戰鬥系統都幾有心思架，但最弊係出招成日 lag 一秒咁，件事超級無臨場感，你仲要我刷迷宮刷怪升 Lv？完全係耐性試煉 Play！

睇 2ch 嘅網友講，Switch 版有改善到呢方面嘅問題嘅，同埋官方仲出咗 Switch 限定免費 DLC「時の闘技場」，可以同其他 Online 玩家或者你嘅朋友仔玩對戰添！所以對呢隻遊戲有興趣嘅朋友，自己衡量下入手 PS版定 Switch 版啦！