【遊戲包膠】《Mass Effect- Andromeda》- 不敢創新卻又背棄傳統

前言︰文長慎入，文章最尾有總結。本文涉及劇透，仍然未玩的朋友請迴避，直接睇評分。

我都未見過人寫評論LAG 咁耐機既，不過分享下啫，冇所謂啦係咪？

作為一個Mass Effect 既忠實FANS，對於呢一部作品，實在非常之難下評價。一來基於對系列作品寄予厚望，怕自己會過份支持或者反對某啲遊戲因素。二來網絡上幾乎都係一片劣評，更怕會因為人地既言論而影響自己既觀感。所以本篇評論主觀意見甚重，請體諒。

話說，呢個遊戲並不是由Bioware 自己整既，而是Bioware Montreal，一間2009年創立既子公司整，佢地第一個和目前唯一一個遊戲就是Mass Effect: Andromeda。

從神作變成普通遊戲

係好多人心目中，Mass Effect 系列都是傳奇既，係Bioware 之前既星戰︰舊共和國武士之後得到成長，正正式式為新既科幻小說系列打造首個具有電影感既遊戲。從寫作，對白，動作至到人物描寫，每種元素都達到電影級。第二集更加將銀河系中每個小人物成長至傳奇既故事寫得嘆為觀止。Mass Effect 之所以係玩家心目中有咁既地位，都係因為這種世界觀既構成同其中人物既處理手法扣人心弦所致。

到了Andromeda 之後，反而所有元素都變成了平平無奇了，連上一個母公司整的Dragon Age: Inquistion 都比唔上。(而DA:I 已經極之平平無奇)。

以下先討論優點，然後再說缺點。

風光如畫既新世界

無可否認既係，ME:A 每個開放世界的地圖都極為龐大，而又每個都有自己既藝術風格，好多星球(除左沙漠星球之外)，每處截圖都係一幅超靚既畫。而又即使你只著重細節、植披或者建築物。每樣野既擺放都有美感，甚至有實際用途。

遊戲利用Battlefield 1 既Frostbite 3 Engine 所寫，好難得咁除了帶了ME2, 3 的掩體穿透攻擊之外，仲充份利用了Forstbite 既場景破壞效能為戰鬥、過場動畫及Boss 戰等加入多種破壞、崩塌既效果。

新奇既戰鬥系統

「你睇！係噴射背包呀！」

2007 年推出的Mass Effect 第一次將第三身射擊遊戲同富有深度系統及劇情的RPG 揉合起來，革新左成個RPG 遊戲類型。但當時十個有九個人都認為遊戲操作實在太過怪雞︰人物唔知邊度係掩護，又冇掣比角色進出掩護，掩護竟然擋唔到敵人既技能攻擊….角色甚至冇一個有效既近戰攻擊…..及後第二及第三代既Mass Effect 汲取教訓，係取用同期大熱第三身射擊遊戲Gears of War 既Unreal Engine 引擎同時，連人地既操作方式都完全照搬左過來，令遊戲性大大的增強。

到今時今日，連Gears of War 都已經越來越被人遺忘，ME:A 有意再創先河，重新建立自己既第三身射擊風格，加入了噴射背包、閃避同自由掩護元素，使得地圖上所有類似掩體的東西都可以變成掩體，將之前第三身射擊遊戲要某種故意擺放既物品才能成為掩體，玩家就不停地按同一個鍵進出掩護的硬性條件拋開，整體令到戰鬥場面更加流暢而且緊張刺激。

好……跟住講缺點

仆你個街！HALO 來既喂？

故事上，呢隻game 基本上即係HALO…….

有玩過HALO 三部曲既朋友，相信玩完ME:A 之後都會大叫出上面果句，因為實在太似。

個故事大致上係講︰

人類係探索太空既時候搵到已經消失左既外星人留低落來既超級武器(HALO ring/Vault)
而同一時間另一種同人類科技水平差唔多既外星人(Covenant/Kett) 極為希望搵到果種武器既總掣，消滅人類同佢地既朋友
於是大家展開左總掣爭奪戰。跟住個腦入面有個AI 既主角(Master Chief/Pathfinder)，終於係AI 既幫助下用到所有遺留既科技
跟住搵到一個人造既太空站，但係內裡好似星球咁(Ark/Meridian)。因為係主角，所以成功阻止左敵人既計劃。

根本就一模一樣！

咁當然……除左係第三身之外，咁ME:A 既戰鬥都係同HALO 5 一樣……DASH 同空DASH，二連跳同邊緣攀爬系統，跳起左開槍會騰空，仲有超級英雄式落地咁既落下近戰攻擊。

「仆你個街！HALO 來既喂？」又要講多次…..

電影感和角色表情動作

本來將遊戲整到好似電影咁本來就係錯，不過有D 例子做得幾好咁就算。Mass Effect 一連四集都以電影感為最終目標，每集預設都開左Film Grain，即係類似電影母片果種雜訊既Filter，想佢望落電影D。但係電影之所以係電影，除左畫面之外，更加重要既唔係演員既演出，同埋故事既鋪排咩？

遊戲界有好多以電影感為目標既遊戲，都不惜一切咁將所有有關遊戲既要素放棄，純做CG，大量既成本用哂來做臉部、身體動作捕捉，跟住寫一個好緊湊既劇本，好唔好玩who cares?

雖然果D 所謂game 真係唔好玩，但係人地起碼用好多錢去做好電影感……

ME:A 果種咁既死魚眼係想點？好好玩咩？

妄想用人手去做出自然既人類面部表情實在太異想天開，大佬呀好心你唔好咁痴線啦！

去到另一個銀河都係果D 野

我都唔明，我明明已經去到另一個銀河系，但係只有兩種新外星人？之前果個銀河系都有十幾種啦！嗱之前抄其他人既唔講，其實呢隻game 都抄左唔少自己DA:I 既遊戲方式，包括好多根本唔關事既收集要素同埋幫好多人做D 完全唔關事既side quest。

個重點係，Mass Effect 一推出既時候，我地見到既係一個全新既世界，十幾種唔同既種族各自有自己既背景，文化，衝突同問題，豐富多彩。我地期待去到另一個銀河我地會見到更多，點知都係果幾個種族，新既種族一個係敵人，本身已經冇乜點講佢地既文化。另一個種族係朋友但係個背景同之前既種族差唔多，都係兩手兩腳兩隻眼，吸氧氣既碳基生物，根本冇特點……科幻之所以科幻係因為可以天馬行空，果D 咩半生物半機械既生命體呀，成個種族都係AI 呀，仲有變形金剛咁既全機械生命，仲有得返靈魂既鬼界生命呀……..有睇科幻小說電影既朋友分分鐘隨口都可以UP 到一大堆，寫科幻寫得你咁安全不如唔好鬼寫…..

廿年傳統一朝棄

自博德之門以來，Bioware 所有既遊戲，包括奇幻科幻甚至乎係武俠，都有一個標準既功能，就係戰鬥中暫停。因為Bioware 整既game 必定係團隊game(雖然你可以玩SOLO)，而團隊入面每個人既攻擊同技能如果唔靠中途暫停真係冇可能落到指令。尤其係唔少Bioware 既game 有團隊Combo 攻擊，如果靠AI 自己放技能咁就真係你玩埋佢果份，因為根本冇可能連到技，咁打最高難度實死硬。

(翡翠帝國都算係中國武俠GAME 之中最打得入歐美市場既GAME)

有見及此ME:A 將指揮隊友放技能同埋遊戲中暫停既功能一次過刪除！

係噩夢！係噩夢呀！

Bioware 既遊戲之所以係好玩，除左係因為故事同世界構築之外，仲有主角同隊友既關係。而呢種關係，主要係用同隊友既戰鬥建立返來。透過同唔同既隊友一齊冒險，因為能力既互補不足同埋連combo，你會感受到除左故事以外，佢地真正係你既戰友，你冇左佢地唔得。

呢個係技能指揮同暫停系統帶比Bioware 遊戲既一種最重要既意義。

而呢隻Game 竟然冇左，係因為咩呢？因為想戰鬥比較流暢D？定係只係唔想煩？呢隻game 既隊友變成左純粹引開敵人既沙包，如果唔係要靠隊友來連combo ，咁邊個都得啦！每一個角色都冇係戰鬥上重要既地方，每個都只係一模一樣既沙包，咁叫隊友咩？你試下足球小將全場都唔係隊友交波，每次都係一個對十一個咁有咩咁熱血？唉……….俱往矣

有五種敵人…..總共

你既敵人主要有四種勢力，每種勢力啱啱好會有

普通雜兵
精英雜兵(有盾)
精英雜兵(有甲)
精英雜兵(有特別技能)
大型Boss 一款

而你就會不停咁遇到呢二十種敵人跟據劇情出現唔同既組合，但係永遠都係呢五款不停咁重重覆覆又重覆。如果係玩最高難度還好，因為敵人既AI 會比較進取同聰明，如果玩普通難度你就只會見到佢地不停用同一種戰術比你虐打……..

最搞笑既係最後一關，我諗住都係果幾種敵人架啦，點知佢出隻地圖BOSS 比我，我仲有少少開心，點知最後個地圖BOSS 係唔洗打既，只係做樣，如我所料咁只係出左一百隻以上果五款敵人比我狂LOOP 咁就爆左機………

被錯失的機會

最後來講下呢隻game 完全錯失既機會，時間線來講，ME:A 班人出發既時候，就係原銀河系被Reaper 攻擊之前兩年，而當時，仍然有一隻Ark (方舟) 尚未出發，所以我地係遊戲中未有見到。

遊戲中探索找到以前既故事，主角出發後兩年Reaper 來襲，成個銀河系不停發出SOS，但係第三集既時候Commander Shepard 明明有四個選擇，可以阻止Reaper 毀滅世界，如果佢成功，咁其實果隻尚未出發既方舟應該差唔多會到達？如果佢失敗，咁有冇回音？

呢樣野其實好簡單咁導入之前既存檔然後輕輕帶過即可，點解咁都唔做？整個世界觀既完整性同埋故事線既連貫性可能就係靠果少少描寫，咁都唔肯做，實在太過浪費。

其次，Bioware Montreal 似乎並沒有魄力去再做Dragon Age: Origin 既創舉。DA:O 入面，主角可能揀幾個種族同背景，會令到大家既教學關有唔同既起始故事，主線中大家會因為你既身份對你有唔同既態度，做出一種傳統RPG 既真Role-play 元素。

Mass Effect 三部曲因為主角一定要係Commander Shepard 咁都算喇，但係ME:A 明明每個種族都有一個Path Finder，點解我地一定要做人類果個？明明教學關乜野都冇，只係有少少對白同動畫講返隻Ark 初來到Andromeda 既遭遇。咁換過另一個種族做同樣既事又有咩問題？每隻Ark 入面Andromeda 之後既遭遇都唔一樣，比少少時間講返咁每個人玩既時候都可以睇到唔同角度既故事，之後就個個人都係一樣咁做Path Finder 啫……….咁都懶我真係膠都廢事俾。