即係咁，玩機最重點同時最纏人嘅係咩嘢？咪就係升 Lv 囉！有啲怪真係唔練 Lv 打唔過，好似最近玩緊 SAO x AW 咁，大佬呀你隻隻怪閒閒地幾百 Lv，雜魚圍毆秒殺你又幾咁閒！但係，起碼都叫做有個廣域地圖比你行、起碼都叫做可以打唔同形式嘅怪吖……如果要你原地轉圈、唔准衝關、無武器買、無得道具加乘嘅情況之下，由 Lv 1 打到上 Lv 99，你又得唔得？

Sor9…我廢青我無耐性我無心機，我・唔・得！但係美國就有位玩家，喺《FF7》第一關「爆破魔晃爐」就將克羅德同埋巴雷特升到上 99 Lv！佢仲要係玩 PS1 版，無加金手指咁樣純耐力 Play！印象中呢一關入面頂多得四定五種怪可以打，即係話呢位毒撚朋友打同一堆怪打咗兩年！無錯，佢日以繼夜（我估）咁打，結果用咗兩年時間原地升 99 Lv！

打機打到咁小妹除咗寫個服字之外都唔知講咩好……又或者咁講，睇完佢呢個壯舉，我以後唔敢同人講我係 FF 系列 Fans，因為我覺得呢位人兄嘅行為已經唔係超脫咗打機嘅層次，係一種修行，係一種心嘅鍛練！簡直為打機賦予新嘅定義吖！

以下係呢位朋友最後一戰嘅片段，嗱我就無耐性睇一粒鐘練 Lv Play，大家可以直接飛到 52:48 部份開始觀看，有興趣嘅朋友一齊黎見證佢兩年魔晃爐苦行路最後取得西經嘅成果啦！