《FF15》DLC 嘅第一彈「格拉迪歐藍斯路線」終於喺 2017.03.28 正式上架！距離本傳遊戲已經相隔三個月，不過可以再次有機會進入 FF15 嘅世界始終係開心嘅。因為本傳入面可以操控嘅角色只有傲嬌王子，所以 FF15 將另外三個角色嘅劇情分別作為 DLC 推出，雖然係就係覺得 SE 社騙金騙很大架啦，不過扁嘴還扁嘴，我當然係晨早買定 Season Pass 等玩啦！

大家記唔記得本傳入面，大隻佬曾經有段時間離左隊話去「修行」嘅？DLC 就係講佢去修行嘅故事。作為王子嘅「王之盾」同埋隊伍入面嘅力量型角色，格拉迪奧喺旅程入面，覺得自己唔變勁啲嘅話，分分鐘保唔住另外三個隊友（誤），所以就聯絡王國將軍，話自己要去「吉古納塔斯要塞」（ジグナタス要塞）入面嘅遺跡挑戰傳說中嘅「劍聖ギルガメッシュ」。

大隻佬嘅攻擊模式好簡單，圓圈攻擊，正方格擋，三角儲氣出大絕；藍色條氣代表格擋，每擋敵人攻擊一下，就可以加乘「Damage」值，最高可以去到 Damage x4！雖然呢個 DLC 難度唔高，但因為本傳入面嘅能力同埋武器係拎唔到過黎用，加上大隻佬唔識魔法、亦唔會好似王子咁有水晶加護自動回血，所以絕對要善用「格擋、儲Damage加乘、攻擊」，如果淨係一味開無雙亂打，打大佬都幾痛架！

長按三角型就可以出重擊，如果儲夠兩條氣先出三角型，就可以出圖中所示嘅超必－馴龍Play！！你估《MH》先有得屠龍呀？我大隻佬有得騎龍添呀，真係少啲腰力都唔掂。呀話時話其實大隻佬呢個遺跡修行劇本，啲「英靈」閃出黎打你個感覺仲好《仁王》添……

探索路上都會有露營陣地比你回氣同埋 Save；不過無左執事四眼仔喺度野外九大簋，兩條友就惟有隊住合味道杯麵先啦。無計，收左人地咁多 Sponsor 梗係要做好代言人嘅責任，笑吓啦，食杯麵食到咁閹是不對的～

打哂路上面三條龍就可以集夠力量去打「劍聖ギルガメッシュ」。咁玩開 FF 系列嘅朋友一定對 ギルガメッシュ 呢個角色唔陌生，喺五代第一次登場嘅暗黑親衛隊隊長，偶爾都會以隱藏最強 Boss 嘅身份客串之後嘅 FF 遊戲。我記得當年玩 FF 零式時見到佢咩 Level 都未練好即刻驚到掉頭走……

打嘅過程就留比玩家自己去享受啦！打完劍聖聽完佢想當年之後，你會成功獲得大刀「源氏之刀」同埋學識新大絕「二刀之流」，呢兩樣野可以比你帶返去正傳入面用……雖然時至今日，應該個個都晨早打爆機……不過唔緊要！二周目三周目歡迎你！

呢個 DLC 其實好短架啫，我玩左大約半個鐘就過左（所以我個心有一剎那覺得好唔抵……）而喺大隻佬 DLC 嘅最後，亦講左下一個 DLC 嘅主角會係金毛BBプロンプト，片段入面見到 プロンプト流哂眼淚梨花帶雨陰公豬咁，劇本就發生喺佢跌落火車、落單流落雪地嘅時候。推出日期預計為 2017 年 6 月，有興趣嘅朋友記得留意返啊 (*ﾟ∀ﾟ*)