講到以歷史文化或者神話故事為主題嚟做遊戲，好多人可能第一時間諗到《刺客信條》系列，或者係《文明》系列，當然唔少得《神話世紀》。前者係以宏大嘅歷史時段為背景嘅角色扮演遊戲，《文明》就以體驗文明發展為主嘅策略遊戲。至於《神話世紀》更加串連各地神話去製成嘅即時戰略經典。不過呢啲遊戲一考反應二考計算。尤其是後兩者，幾乎每一步都要經過好精深嘅計算先玩到落去，其實有時玩落真係幾大壓力，亦都冇咩心情去體會當中嘅文化味道。
今日想同大家介紹一款輕鬆啲嘅歷史主題遊戲：《北庭》（Northgard），係由一間喺法國嘅獨立遊戲工作室城•遊戲（Shiro Games）製作。如果對北歐神話有涉獵過，由遊戲名開始就已經見得到佢嘅神話背景──北歐眾神就住喺阿斯嘉德（Asgard），而人類就住喺中庭（Midgard）。遊戲名 Northgard 就係用咗呢個典故而改嘅。
三個男人打天下
《北庭》入面，你係扮演一個北歐嘅家族（clan），信仰一種北歐神靈（暫時得神狼芬里爾Fenrir、神鹿埃克修尼爾Eikthyrnir、神羊海德倫Heidrun，似乎就快出神鴉）。你家族有三個男人，而你就要靠呢三個男人，成為所在嘅大陸上面嘅重要家族。就咁聽落去好似好簡單，但係你面對住北歐嚴峻嘅自然環境，要令呢三個男人可以開心、健康咁生活，令家族可以繁衍落去，仲要可以拎得起斧頭劈得友，事實上唔簡單。
神鹿埃克修尼爾Eikthyrnir
冇沃土就唔可以耕田
因為如果你搵唔到魚池、搵唔到沃土、搵唔到野鹿群，你呢三個男人就只可以食野果。而且，每年嘅冬季，採集食物變得困難，仲會加倍消耗木材用嚟保暖。當你嘅人口越嚟越多，佢嘅所需要嘅食物同木材亦會越嚟越多。唔好彩嘅話，冬季仲會出現大風雪，到時存活就更加困難。除咗自然環境嘅挑戰之外，仲有野狼同屍鬼會不時攻擊你嘅領地。當然，更加唔少得嘅就係其他家族嘅攻擊。雖然遊戲係以神話作為主題，但以上種種你會面對嘅困難，正正就係北歐人喺古代面對嘅困難。所以將《北庭》列入歷史遊戲都不為過。
冬季來臨比外敵更危險
勝利方法好有幾種，儲食物、儲錢、儲科技都可以係贏嘅條件。當然亦都唔少得征服勝利，消滅晒其他家族你咪係最重要嘅家族囉。不過，由於係一隻仲開發緊嘅遊戲，好多地方都未係咁完善。例如話遊戲時間太短，只要熟咗手，遊戲本身提供嘅咁多種贏法，甚至係咁多個成就，都好快解得完。另外就係因為佢未完成，暫時仲未有戰役模式，亦即係話佢依家只有背景，冇有故事。
唔同嘅贏法
話就話好唔完善，不過作為一隻仲開發緊嘅遊戲，趣味同玩法都對得住嗰百幾蚊有餘，配樂亦都非常有味道。個人嚟講亦都期待佢嘅戰役模式會唔會有咩突破，另外就係以佢嘅遊戲方式，開發網上對戰亦有佢嘅潛力嘅。當然啦，咁樣嘅慢半拍遊戲啱唔啱你，就見仁見智喇。
(遊戲暫時只有 Steam 版，有興趣既朋友可以去呢度下載：//store.steampowered.com/app/466560/)
玩埋啲人唔玩嘅Game，最驚畀人問打咩機。