LEGO 喺香港開設「樂高認證店 LEGO Certified Store (下稱LCS)」上星期五就開業 100日，為慶祝呢就搞左個全店八五折去益玩家。結果就因無限制購買數量，有人 Hold 起咗大量貨囤積，仲要比人影到，爆出今次既事件。唔少玩家認為 LCS 咁樣做會助長炒風，而事後 LCS 亦無對呢件事作出任何回應。

當然大家都覺得 LCS 咁做，一定係 LEGO 官方有份啦！但大家要留意一點，LCS其實係特許經營店，佢嘅銷售方式同方向係可以同官方有所不同。喺佢地眼中 LEGO 只係一件貨物，就係咁簡單。

其實 LEGO 由兒童玩具變成炒賣工具都唔係呢一兩年嘅事。每年有幾多限量版被炒上天價，但嗰啲我地定義為收藏品。無錯，收藏品成為一個炒賣品我都覺得問題不大。正如波鞋一樣，平有平著，貴有貴炒，有市有價，自由經濟啫。商家賣到數，其實佢理得個市場係點玩，我有生意咪得囉。玩家想官方打炒風？佢真係不如出多幾個款好過。

早前同幾位有返咁上下資歷嘅台灣玩家傾過下，其實都比左個幾好嘅經驗比大家。早幾年台灣LEGO除左百貨公司外，大部份都靠商舖拎水貨，加上當時無依家咁多資訊，結果有啲黑心商人就囤貨高價出售。台灣玩家經歷過幾次呢啲事件之後，依家遇到啲不良商人都會喺網上群組通報，一齊罷賣直到回落到官方資料價格水平。可惜香港好多收藏者寧願比多幾舊早啲擁有影張相打卡好過。

「其實唔好話 LEGO 呀，基本上所有野喺香港搵到錢嘅都會炒啦。」開LEGO 零售店多年嘅店主唏噓咁繼續講「一盒 LEGO 你唔開盒唔玩嘅話，佢係無左佢嘅意義。LEGO 係要開盒玩！」但問到 LCS 其實有冇影響到多左玩家「有，但同樣地多左更多炒家囉！」佢亦講到一個自由經濟社會，大家要買要賣都係睇自己可唔可以負擔，但佢就好希望喺佢度買 LEGO 嘅朋友係「買返去玩」而唔係「買返去擺」。大家都明白香港嘅「土地問題」，但如果你儲埋嘅 LEGO 只係為起幅「嘆息之牆」比自己自 HIGH 嘅話，儲吉盒可能仲化算。

作為一個有買過、有賣過、有搶過貨嘅 LEGO 玩家，見到不斷有炒家出現、一啲不良商舖只賣大陸客、囤貨炒貨等等，不如去返啲有返啲信譽嘅店舖總好過比啲炒家賺。到最後 LEGO 最吸引人嘅唔係從佢當中賺到嘅金錢，而係組裝、創作同分享中得到嘅快樂。 LEGO 嘅本義大家都可以查得到係來自丹麥語「leg godt」，即係係指「play well(好好咁去玩 / 玩得好好喎)」。玩家們，開盒玩吧！