喺對VCG 2017 天梯賽作出預測前，我哋首先重溫一下一啲對戰常識先。

A) 屬性

(屬性表) 另外粉末招式對草系無效，鬼系無法被綑綁。

B) 先手次序

//gamer.vjmedia.com.hk/13454/pkm-13092016/

好似呢篇賽局分析及一直以嚟攻略都有講，2v2 比起 1v1 更講求先手。所以先制技、速度控制係相當重要。而第七世代為 2v2 進行咗一啲針對調整，例如加入反先制、疾風之翼調整、麻痺效果等。以下我哋一齊嚟慢慢詳述先手相關。

1)先制：

平常嘅攻擊或招式一般視為先制＋0，而快一個層級嘅則為先制＋1；最快先制＋5，最慢為後制－8。而於表後，我亦會列出一啲特別要注意嘅項目。

a) 擊掌奇襲 (常稱：下馬威 ；ねこだまし ；Fake Out) ：

普通系；物理；40威力；100命中；先制＋3；使目標膽怯。

經常活躍於對人戰之中，能夠有效破解滿血時生效嘅效果（如：奇蹟防禦、疾風之翼、振奮綁帶、頑強等) ，另外亦能夠截擊對方攻擊手／控場手一回合時間嘅行動。能夠防範呢招嘅，除咗一如既往保護技、比佢高速嘅快速防守外，第七世代新加入嘅反先制當然有效。

b) 突襲 (ふいうち ；Sunker Punch) ：

惡行系；物理；70威力；100命中；先制＋1；對象必須處於準備攻擊 (物理／特殊) 狀態才會成功，否則突襲失敗。

高威力先制技，已經活躍咗好幾世代，特別對於格鬥系、普通系嘅 Pokemon 嚟講，能夠反制超能力系同鬼系。活躍咗幾個世代後，第七世代威力由 80 下調至 70，再加上反先制同埋干擾系多元化後，威脅能力已經下降咗唔少。

c) 惡作劇之心 (いたずらごころ ；Prankster ) 、優先治療 (Triage) ：

變化／治療招式獲得先制＋１。

干擾及輔助型 Pokemon 經常備有嘅特性。惡作劇之心配備鬼火、麻痺、混亂、安歌等招式會令對方主力陷入失去戰力嘅狀態。同時間能夠優先於對方速攻型 Pokemon 攻擊前治療救助隊友／自己。不過由於第七世代對麻痺、混亂等狀態及招式削弱，並加入咗反先制及預設神秘／雷神場地特性嘅島神，長期以嚟干擾系嘅橫行程度稍微壓制（其實只係因為初時設計時係為 1v1而設，但當改為 2v2 為主時，先致使橫行) ，但仍然係相當具戰略價值。而優先治療為惡作劇之心弱化版本，只係得返用先制治療系技能救助隊友／自己功能。

d) 疾風之翼 (はやてのつばさ ；Gale Wing) ：

//gamer.vjmedia.com.hk/14639/pkm-13102016/

正如前文所述，烈箭鷹因為特性而廚到無以復加，所以踏入第七世代削得最大力嘅一隻就係佢。疾風之翼增加咗「HP全滿時」嘅條件，變相使用勇鳥 (ブレイブバード ；Brave Bird) 嘅話就只能使用一次 (因為勇鳥會有反作用力傷害) ；不過無損佢用先制順風 (おいかぜ； Taiwind) 嘅半輔助型打法，更何況佢可以先用飛行系Ｚ招式先攻擊再作勇鳥；當然亦有人提出佢可以使用空中雜技嚟代替勇鳥，不過因為失去生命之玉嘅加成，烈箭鷹肯定無法做返上一世代嘅火力，更何況即使被扣少少ＨＰ，佢都已經失去疾風之翼，出場率大幅下降係意料之中。

e) 集火系列：

//gamer.vjmedia.com.hk/14306/pkm-04102016/

從暴露菇一篇中，其實我哋知道集火系列招式：忿怒粉 (いかりのこな ；Rage Powder) 、看我嘛 (このゆびとまれ ；Follow Me) 、聚光燈 (Spotlight) 係相當強力。而由於佢哋嘅施放對象唔係對手，所以唔受反先制嘅影響 (以快速防守嘅經驗，待實證) ，第七世代甚至加入更具惡意嘅聚光燈，非但唔可以以防粉末措施無效化，更可以自己／隊友中選擇一隻作為集火目標。聚光燈嘅使用者包括新 Pokemon 睡睡菇系列、寶石海星、皮可斯及晃晃班，佢哋嘅出現將會分薄咗暴露菇嘅出場率，但更令到集火系列招式變得常見。再詳細一啲有關單擋隊／組合嘅攻略，留待下一篇講。

f) 反先制特性／念力場地：

第七世代加入兩種新特性，女王保護 (Queenly Majesty ) ／鮮豔迷彩 (Dazzling ) ，兩者都係保護我方唔受先制招式攻擊，即預設快速防守；另外念力場地為由招式／特性產生嘅場地，令到包括敵我在內、觸地嘅 Pokemon 產生唔受先制招式攻擊。第七世代加入嘅反先制特性及場地，係為咗削弱猖獗嘅先制技戰鬥，並確保耐久力一般較差嘅速度型 Pokemon 有其生存空間。

2)控速：
同一個優先 (先制) 層級下，出招嘅次序就由速度主宰。所以一般嚟講，隊伍中會有唔同嘅控速手段：分為加速、減速、欺空。

a) 加速：
當中包括主力攻擊手設法加速、接力加速及控速手施放順風。 由於速度即使只係快過１點，就同快過１００點一樣。所以備有加速手段後，反而有唔少人會投放努力值到ＨＰ上以提高生存力。

加速招式：龍舞 (1級速度／攻擊) 、蝶舞 (1級速度／特攻／特防) 、高速移動等 (2級速度)
順風：4回合內 (實際為往後3回合) ，我方速度2倍
特性 (天氣／場地) ：悠游自如／葉綠素／撥砂／撥雪 (雨天／晴天／砂暴／霰天下，速度2倍) 、衝浪之尾 (電氣場地中，速度2倍)
特性 (狀態) ：飛毛腿 (異常狀態下，速度1.5倍) 、不屈之心 (膽怯時，速度提升1級)
特性 (其他) ：膽小 (受到蟲／惡／幽靈招式攻擊，速度提升1級) 、電氣引擎 (受到雷系招式攻擊時，不受傷，並提升速度1級) 、加速 (回合完結時，速度提升1級)
道具：速度圍巾 (1.5倍速度；只能使用第一次使用的招式)
b) 減速：
控速手會設法減對方速，以幫助隊友先手。一般嚟講係由干擾手或輔攻手擔任，包括使對方陷入麻痺狀態嘅干擾手。不過由於麻痺被大幅削弱，由原先「1／4速度」變成「1／2速度」，變相未必比用範圍減速招式穩定。
減速招式 (範圍) ：電網／冰凍之風 (55威力；下降1級) 、吐絲 (下降2級)
減速招式 (全場) ：重踏 (60威力；下降1級)
減速招式 (單體) ：下盤踢／岩石封鎖 (60威力； 下降1級) 、泥巴射擊 (55威力；下降1級)
黏黏網：對方換入Pokemon時，速度下降1級 (飄浮、飛行除外)
特性：黏滑／捲髮 (被近身攻擊時，對方速度下降1級)
麻痺：1／2速度；1／4機率無法行動

c) 欺空：
戲法空間 (常稱：欺詐空間；トリックルーム ；Trick Room) 中負責施放欺空嘅控速手，我哋特別稱呼其為欺空手，以反轉速度次序作為控速手段。組成欺空隊，一般由極慢速嘅隊伍組成，佢哋一旦成功進入戲法空間，一般常速隊伍將無可能反超前。

詳情可參考《Pokemon天梯入門》1600對賽觀摩＆主流戰術認識，欺詐空間隊一段

(常見欺空手；克雷瑟利亞 )

於 2v2 賽局中，能夠先手攻擊對方，甚至於對方攻擊前將其擊倒 (猶其於集火攻擊下) ，絕對係對戰課題中必讀而且重要一環。因為一直以來對戰由 1v1徐徐演變成 2v2，所遊戲商對先制、麻痺進行不同程度嘅削弱及加入制衡。因此我除屬性表外，會於第一篇首先討論有關先手次序嘅變化 (Nerf／Buff) 及一啲基礎技巧教學。下一篇將會係 C) 屬性聯防、D) 隊伍組合。

回帶相關文章：

《Pokémon天梯入門》禁MEGA石後必用廚獸－No.663 疾風怒濤！烈箭鷹！

《Pokémon天梯入門》使用率前五干擾手 －No.591 暴露菇

《Pokémon天梯入門》No.115袋獸

《Pokémon天梯入門》烈日晴空－No.006噴火龍Y

《Pokemon天梯入門》1600對賽觀摩＆主流戰術認識

《Pokémon天梯入門》變幻自在嘅人氣主角－No.658 甲賀忍蛙