上次篇文講完 P5 嘅劇本大綱 (連結按此)，今次就介紹遊戲嘅基本流程以及衝關時需要注意嘅地方。

【日常流程】

遊戲每個章節嘅大佬都唔同，而打大佬嘅方式，就係以「怪盜團」身份去 Boss 嘅內心偷走「邪念」從而令佢洗心革面。所謂嘅「內心」即係唔同類型嘅獨立迷宮，迷宮100％探索完成就可以出「預告信」正式打大佬。

每個大佬都有攻略期限，如果過左 Deadline 都未打大佬就當 Gameover；雖然講到好似好緊張咁，不過通常個 Deadline 都好鬆……所以一定要善用 Deadline 入面嘅時間做各種日常經營。

【人際關係】

人際關係（Corparation／コープ）係遊戲中最重要嘅支線，角色好感度每上昇一個階段，佢地就對你產生嘅幫助就越大。角色會透過 SNS 對你進行邀約，應約的話，就按該角色劇本進行特定對話選項情節。

咁如果同時有幾個角色進行邀約，應左一個機，其他關係唔通就要放棄經營？放心，無咁唔人道～加上唔同角色出沒嘅日子、時段同埋地點都會有唔同，所以喺遊戲初期未熟習角色習性嘅時候，按 R1 切換地圖，有藍色塔羅牌顯示嘅地方，就代表你可以去嗰度同角色進行交流。

【角色關係優先度】

要攻略好感度嘅角色有十幾位，而且有男有女有老有嫩（心）

我自己嘅玩法當然就係不理好醜，一周目男女通吃啦，因為好感度到頂之後會有限定道具送，喺玩二周目嘅時候非常有用；以下係我個人推介要優先攻略嘅角色。

月 (三島由輝)

作用：戰鬥中得到的經驗值會大幅增加

節制 (川上貞代)

作用：

(1) 增加學校自修課機率 (自修可閱讀、或製作迷宮裡面用嘅輔助工具，例如係開特定寶箱的鎖匙)

(2) 晚上代你製作補 SP 用品 (咖啡／咖哩) ，因為補 SP 用品在店舖係買唔到的！

(3) 好容易令人諗歪嘅「電召女僕全身按摩」！呢個係超有用功能！因為在攻略迷宮後，會少左一次晚上自由活動機會；但搵班主任幫你鬆完骨，當晚就可以活動返啦！想稱霸全支線嘅玩家一定要勤啲電召老師呀！

恋愛 (高巻杏)

Battle 同伴，火屬性，輔助魔法對戰鬥有用

女教皇 (新島真)

Battle 同伴，核屬性，全體防御魔法

皇帝 (喜多川祐介)

Battle 同伴，冰屬性＋物理攻擊；並可以將高級技能復製存底

隠者 (佐倉双葉)

Battle 同伴，後緩角色，戰鬥中會隨機為全體成員補體、SP、增強能力

Battle 系角色好感度越高，越會在戰鬥中幫到手，例如自動角色回復以及出現合作戰鬥技等。

剛毅 (カロリーヌ＆ジュスティーヌ) (雙子看守)

作用：減低鍊成 Persona 的費用、開放鍊成比自己等級高的 Persona (要鍊成遊戲中最強 Persona 一定要達到關係最高階
星(東郷一二三)

作用：假如去到後期你練到好高 Level 應該唔想再打啲雜魚怪（笑）東鄉的能力可以幫你在使用「埋伏攻擊」時，唔需要戰鬥就自動將敵人收服。

你仲可以同好感度到達「第八段階」的女角色成為情侶，唔駛怕羞架，因為溝到女都係獎盃黎！不過千祈唔好一腳踏兩船，如果唔係情人節 EVENT 你會死得好慘 www

以上為與監護人的互動圖示。

所有關係到達最高級，可獲得銅獎盃「真の協力者」。

【個人能力提升 (人間パラメータ) 】

主角能力和以往系列作一樣，分別為知識、度胸（勇氣）、器用さ（耐性）、優しさ（同理心）及魅力；日常生活裡可以進行許多活動，例如閱讀、兼職、睇 DVD、晚上去浸浴……都可以分別為五個能力值加點數。

部份角色關係需要你某方面能力到達某等級先開放，所以大家都可以參考下面呢個表，去判斷自己要點樣分配時間 w

【收集篇】

既然係 JRPG，又點會少得儲呢樣儲嗰樣嘅支線……例如：全書閱讀、全 TV Game 攻略、釣魚、打棒球等。

仲有個人覺得最花心機嘅係買齊所有汽水機嘅飲料 (每樣要買一種)

因為唔同階段地區都會定期轉新產品，所以大家要得到呢個儲飲品獎盃，惟有行多兩步～

【潛入迷宮】

迷宮雖然偶有機關，不過玩開 JRPG 嘅朋友應該唔會覺得難；遇到掘頭路嘅時候就善用高空路線或者地道。

潛入迷宮時一定要善用「埋伏 (COVER) 」。

Cover 攻擊有兩個好處：

(1) 抑止或降低 BOSS 警戒度

(2) 在戰鬥中優先出手

警戒度一旦越過 50％，敵人會出現得更頻密；100％的話會強制脫出迷宮。

【戰鬥篇】

除左主角以外嘅角色，可以比個方針佢地、等佢地自由發揮……不過我玩 P3 同 P4 嘅時候覺得 CPU 控制都係笨笨地 (´・ω・`) 始終都係自己全權在握好玩啲。

針對敵人的弱點屬性進行攻擊、或者 Critical 攻擊時（隨機發生），可以讓敵人倒下。

敵人倒下之後有兩個選擇。

(1) 全體攻擊 (能夠大幅扣減敵人HP)

(2) 進行談判。

談判成功的話可以得到錢、道具、或者讓敵人的 Persona 加入到你的目錄裡。

【PERSONA】

戰鬥中收服嘅新 Persona 只要在名冊上登錄，就可以再召喚出黎合成或者戰鬥。

以下為本遊戲最強的 Persona，合成過程好麻煩但係……能力值真係超高！我認命！

【角色經驗值】

每場戰鬥所有成員都會獲得 EXP（就算無落場打都有 LOL）呢一點真係好 Friendly。

不過有道具加速升 Level 就最好啦……

二周目限定 EXP 加乘道具：

(1) 月 (三島由輝)

一周目關係 MAX 後獲得；可繼承至二周目

(2) 剛毅(看守雙子)

一周目 MAX 滿，二周目會成為隱藏 BOSS。

打敗後與她們對話後，可獲得的其中一項道具：時短のリング

以上都係我二周目之後對於 P5 嘅部份心得，都係希望可以引起大家嘅興趣 ❤

當然我講嘅都係遊戲主要流程嘅內容，所以如果講得片面、或者有玩家覺得講得唔夠豐富嘅地方請多多包涵 (´・ω・`)

回帶相關文章：

【女神異聞錄 5】綜觀遊戲感想（含劇透）