早二個月任天堂既線上發布會宣布會係 12月 1日推出《Super Mario 製作大師 for N3DS》，隻 Game 本身就係 Wii U既 (不過又有幾多人有？)，而家正式移植落去 N3DS 度啦，消息一出就受到好多人關注。鬼咩，你地上網見到好多超難關卡大部份都係用呢個 Maker 整出黎，梗係吸引人啦，咁官方日前就放咗條介紹影片出黎比大家 J 下先。
咁簡單講下隻 Game 玩乜啦，主要係用比你創作 Mario 既關卡，透過觸碰筆再利用遊戲預設既 60幾種元素黎設計屬於自己既關卡。由最舊既 Mario 1 到 Wii U 版既 Mario 風格都整到，仲可以幫啲怪加翼阿、變大等等，都幾過癮！
有成60種野比你玩
8Bit 到 3D 風格
咁除咗最主要既自訂關卡之外當然係會有官方設計既關卡啦，遊戲會收錄 100 個任天堂原創關卡比大家玩，而且每關都會有「收集全部金幣」、「打倒所有敵人」呢類成就玩。另外仲附有可隨機連線玩 Wii U 版投稿關卡「100 人 Mario 挑戰」同埋有得 Download Wii U 版推薦投稿關卡。
隻 Mario 好似有啲怪怪地……
今次既《Super Mario 製作大師 for N3DS》基本上接近完全移值 Wii U 版既內容，不過比較可惜既就係無 Wii U 版既 Online 投稿，只可以透過面對面或者擦身而過連線同好友交換自己創作既關卡，希望之後會有更新比人投稿啦。
最後大家睇下人地整既關卡 ♥
VJGamer總編，細細個已經蒲機舖，機齡甚深，熱愛電玩文化。