由「COMPILE HEART × 電撃文庫 × 電撃 PlayStation」共同製作既 PS Vita 3D 迷宮 RPG《神獄塔 Mary Skelter》出咗條新片，今次條片係成隻 Game 最精彩既部份：就係幫囡囡進行「污穢浄化」系統，成件事係非常之咁神聖架！

《神獄塔 Mary Skelter》由「COMPILE HEART × 電撃文庫 × 電撃 PlayStation」三方共同製作，故事原案方面就由乙野四方字擔當，角色設計則為ナナメダケイ。

故事係描述日本突然出現一座由地底666米延伸至地上有生命既巨大監獄塔「Jail  (ジェイル)」，周邊仲出現咗堆叫「Marchen (メルヒェン) 」既怪物不停捉人入去座塔度，而我地既主角愛麗絲 (CＶ：上坂堇)，同佢隻兵「傑克 (ジャック)」以殺出座塔為目標，故事就此展開。

咁係塔入面有班「血式少女」係可以透過覺醒而大幅提高自身能力既，但係當呢班女持續戰鬥既話就會令到心靈累積污穢並且陷入瘋狂，係呢個時候就要用到上面條片既「污穢浄化」系統：用謎之液體直接碰觸血式少女身體幫佢淨身，完事後仲會加 HP添！

「血式少女」有小紅帽、白雪公主、睡美人、拇指姑娘同輝夜姬等等，全部都係童話故事入面既人物，而且每個角色都會有狂氣狀態 (第二造型)。

遊戲戰鬥系統採用半回合制，類似蒼之騎士團咁玩。而「血式少女」亦都可以轉換職業同埋學到唔同既技能，一般 RPG 既武器強化都會見得到，當然唔少得既就係豐富既解謎要素，作為 RPG Game 都唔失禮。

《神獄塔：Mary Skelter》小說版已經係電擊文庫發售，而遊戲就將會於 10月13日係日本發售，PS Vita 限定。