係 9月 13日推出，由《Rockman》之父稻船敬二同埋 Armature 聯手開發，講述人類同機械人之間友情既動作遊戲，試玩過後我好肯定咁同大家講，《ReCore》呢隻作品絕對一洗《Mighty On.9》既頹風，係一隻非常出色既第三身射擊動作遊戲！(其實更類近 ARPG)

遊戲呢就有 Xbox One 同 PC Steam 二個版本，支援 Xbox Play Anywhere，即係只要你有 Xbox One / Win 10其中一個版本就可以互通交換 Save 同平台，而我玩既係 Xbox One 版本。

故事背景係講人類為咗移居一個行星，係行星上掉咗班堆行星居住化作業用機械，而為咗維修呢啲機械就另外有堆內置 AI 既機器人「CoreBot」。跟住就成堆人移居到呢個行星然後就進入冷凍睡眠，一心諗住訓醒就可以收割成果。點知瞓咗兩百年之後，主角 Joule 一起身並唔係見到有得住既城市，而係無盡既沙漠，仲要一個人都見唔到，而果堆「CoreBot」全部失控襲擊人類，身邊唯一既伙伴就係機械狗：Mack。

先講畫面，角色設計充滿住濃厚既美色風格，主角面相係屬於樣衰級別既。但係地圖設計係非常之用心，開頭沙漠中間既環型建築，沙漠中間既流沙地帶都有唔同特式，關卡既設定亦都差唔多全部經過計算，你係跳唔到就跳唔到，要諗其他方法過去，抵讚！不過偶然有小部份地方會有爛多邊型既情況出現，算係小小既瑕疵。

主角面相係近年難得一見既災難性級別

關卡設計有心思

遊戲主要由幾個部份組成：探索、升LV、組合機械、解謎

探索

成隻 Game 要推故事進度最主要係睇二樣野，其中一樣就係要係大地圖 / 副本收集稜鏡核心，而大地圖上既稜鏡核心不外乎係打怪或者係 Unlock 機關得到，唔算太難。

升LV

比較似 ARPG 既地方，如果純推主線就一定面臨卡關問題，因為佢好多地方係有等級限制，呢個時候就要周圍行黎行去打怪升LV。

呢度不得不提既就係《ReCore》出色既戰鬥系統！好多人話呢隻 Game 基本係 Rockman，我只可以話你中咗少少，最有 Rockman 味都只係果下二段跳+空中 Dash 咋，Rockman 重心既屬性相剋係無出現的，取而代之既係比較類似射擊名作「班鳩」既轉顏色武器系統！

隨住遊戲推進你會得到 3 種唔同顏色既槍，最基本既用法就係隻怪咩色你就轉返一樣既色去打佢，但係呢個只係最基本既用法。

實際上每種武器用儲力彈都會附有相關既屬性，例如紅色會做成持續傷害既燃燒，藍色會令對方麻痺等等，配合唔同場合使用絕對係戰術考量，尤其 Boss 戰時會出現極多唔同顏色怪，完全有果種「佢家下黃色衫，又變返著綠色衫」既感覺！

紅色槍儲力效果：燃燒

藍色槍儲力效果：麻痹

黃色槍儲力效果：重力

組合機械

遊戲入面輔助主角既機器人「CoreBot」主要有三隻，狗、蜘蛛、機械人，後期可以透過換 Core 而變成另外 1隻機械(仲有傳說中既T8-NK)。每隻「CoreBot」都有自己既專屬技能去幫你解謎，而且戰鬥時會幫你手打怪，要升級「CoreBot」就只有收集藍圖刷素材，呢點我就無乜花時間去特登刷啦，但係由數值上面睇到分別都頗大的。

解謎

主要出現係副本地圖，每個競技場副本都會有三個特定條件要你達成，每成功一個會有相應既獎勵，但係最正既係副本既構成。

而其中都必定會出現一個條件：限時內到達終點。

系統比你既時間極少，對操控有返咁上下先可以達成

另外必定會出現解謎部份，難度仲要直逼 Batman Arkham Knight 既小丑 Quest，堅有水準！

整體評價

基本上有三個問題：故事劇情無乜特別、太多 Loading 時間同埋角色面相極其樣衰，但係其他地方都做得好出色！

戰鬥系統簡單易上手，當然有得揀難度既話就更加係 Perfect！

而謎題方面直頭係超水準表現，刷素材砌機亦都唔係強逼你去做，無去夾硬拖長遊玩時間呢方面係幾有良心，《ReCore》呢隻 Game 絕對適合一眾動作 Game 新手老手！