隻《King Of Fighter XIV》就出咗一個星期左右啦，成功令到格鬥 Game 界又熱鬧起黎，咁係最近日本果邊就有人出咗個《King Of Fighter XIV》最強角色排行，想知自己用緊果隻係排咩位就睇落去啦！

今次呢個排行係黎自日本既梅園 UME-ZONO，佢曾經係 Mix Up Night 入面既 KOF 拎過全國第三架！有一定既公信力！

今次 UME-ZONO 既排行榜亦都刷新咗格鬥 Game 既一個紀錄，就係最強頭 5名全部都係女角！

好啦，而家就為大家介紹 Top 5 角色！

麻宮雅典娜

最佳隊伍排列位置：2 或 3

超強飛行道具角色，簡直係 THE KING OF 波。除咗雅典娜個波性能高之外，仲同時擁有幾乎可以反彈所有飛行道具既反射盾 (試過反唔到傑斯既 Double 烈風拳)。而雅典娜既超必能量主要用黎轟開對手拉開距離，所以比較推薦放 2 或 3，不過打頭陣都 OJ。

 
對娜可露露不利，對 Mature 就大家都 55波，而對所有飛行角色大有利，而且雅典娜既通常技都非常強。

Mature

最佳隊伍排列位置：3

極無恥角色，係 MAX 爆氣狀態下無敵。非常依賴超必能量槽，所以最佳隊伍排列位置只有第三位。因為 MAX 爆氣發動中挨打係唔會增加能量，所以 Mature 最大既問題係就係比人撳住黎打，不過只要發揮得好咁係 Mature 眼前既都係沙包黎。

 
對娜可露露有利，對雅典娜就55波，切記超必能量槽就係 Mature 既生命。

Leona

最佳隊伍排列位置：2 或 3

最好有能量，但係考慮到對某啲角色淨係玩耳環炸彈就可以玩死對方，所以就唔係話非常依賴能量槽。
跳重拳破防，28 A/C 既防禦，去到連招既攻擊力，每一項都拎滿分！

對娜可露露不利，對雅典娜小有利，對 Mature 不利，而對低 Rank 角色則可以發揮出優秀既壓制能力。

不知火 舞

最佳隊伍排列位置：2 或 3

儲存超必能量槽能力一般，所以最好第 2 或 3出場。立輕腳性能優秀，對一部份角色擁有絕對強勢。

對上位四位角色都無大不利係舞既特徵，對所有角色都可以打得有來有往，只係對娜可露露有小不利。

娜可露露

最佳隊伍排列位置：2

無需使用 MAX 爆氣，所以最適合放第 2。不過因為儲超必能量槽能力非常高，所以其實放咩位置都可以。如果唔知道要練咩角色首推娜可露露！

對 Mature 不利，對雅典娜、Leona 有利，對其他幾乎所有角色都係大有利！

另外 UME-ZONO 亦都有提供埋現行版本下全角色 Rank，圖表越頂端越強，越下面就越弱